Bolalarda suyak ko‘migi transplantatsiyasi joriy etiladi

Nima bo‘lsa, bo‘lsinu farzandlarimizning biror joyi og‘rib qolmasin. Agar shunday bo‘lsa, na hayotimizda, na yeyish-ichishimizda halovat bo‘ladi. Ayni jihatlarni hisobga olgan holda “Aholi salomatligi — 2030” strategiyasi loyihasining 2024-2026-yillarga mo‘ljallangan amaliy tadbirlar rejasi ishlab chiqilgan. Unga ko‘ra pediatriyaning barcha yo‘nalishlarida diagnostika, davolash, profilaktika va reabilitatsiya bo‘yicha ixtisoslashtirilgan yuqori texnologik tibbiy yordam ko‘rsatish, jumladan, bolalar xirurgiyasidagi — neyroxirurgiya, kardioxirurgiya, otorinolaringologiya, oftalmologiya va ortopediya kabi sohalarni rivojlantirish rejalashtirilmoqda.
Shu maqsadda har yili 3 ming nafargacha bolada tug‘ma yurak nuqsoni hamda bosh miyadagi patologik o‘zgarishlar (jumladan, gidrotsefaliya) bo‘yicha jarrohlik amaliyotlari o‘tkaziladi. Yiliga kamida 110 nafar bemor bola uchun transpedikulyar tizim (fiksatorlar) to‘plamlarini qo‘llagan holda skolioz va umurtqa pog‘onasining boshqa patologiyasi bo‘yicha jarrohlik operatsiyalari bajariladi. Bunda suyak ko‘migi transplantatsiyasi amaliyotini joriy etish ko‘zda tutilyapti.