Qayga boqmaylik ko‘chalar, mahallalaru xonadonlar obodligi yo‘lida katta ishlar olib borilmoqda. Bunda “Obod xonadon – obod ko‘cha – obod mahalla” tamoyili yurtimiz ahliga kuch-g‘ayrat va shijoat bag‘ishlagan. Ushbu tamoyil asosida Boysun tumanidagi “Duoba” mahallasida 50 qatnovga mo‘ljallangan shifokorlik punkti binosi foydalanishga topshirildi. Bu mahalla ahlining tibbiy xizmatga bo‘lgan ehtiyojini qondirish bilan birga, sihat-salomatligini asrashga xizmat qiladi.
Amalga oshirilgan ishlar tibbiyot punkti bilan to‘xtagani yo‘q, 180 o‘rinli maktab filiali binosining yangidan qurib foydalanishga topshirilgani o‘quvchi-yoshlar bilan bir qatorda ustoz-murabbiylarning-da, ko‘nglini tog‘dek ko‘tardi.
Albatta, ana shunday ezgu ishlar boshida mahallaning jonkuyar faollarining xizmati katta. Ularning sa’y-harakatlari, mahalla ahlini birdamlikka, ahillikka chorlashi bilan har qanday muammo zumda yechim topayotir. Mahalla “yettiligi”ning risoladagidek faoliyat yuritishi, xalqning muammo va masalalarini yechish uchun barcha shart-sharoitlar muhayyo bo‘lsa, nur ustiga nur. Shu jihatlarni hisobga olgan holda “Duoba” mahallasida dastur asosida mahalla binosi barpo etildi va ayni kunlarda foydalanishga topshirildi.
