Bahor kelishi bilan qir-adirlarni, maysalarni, ayniqsa, Navro‘zni intiqlik bilan kutamiz. Yangi yilga yam-yashil archa yarashganidek, Navro‘z ayyomini ham qir-adirlarsiz, so‘lim tabiat qo‘ynidagi sallar, halim-u ko‘ksomsalar, doshqozonlardagi biqirlayotgan sumalaklaru, kuy-qo‘shiqlarsiz, o‘lanlarsiz tasavvur etib bo‘lmaydi.
Ammo adirga chopqillashga, tomoshalarga, o‘yin-kulgiga oshno bo‘lishga imkoniyati bo‘lmagan fuqarolar ham oramizda bor. Ularning ham ushbu ayyomni qarshi olishga, quvnab-yayrashga, Navro‘z nafasini his qilishga-da haqqi va ehtiyoji bo‘lishi turgan gap.
Qumqo‘rg‘on tumanida “Navro‘z muborak bolajon” shiori ostida o‘tkazilgan ma’naviy-ma’rifiy tadbir jismoniy imkoniyati cheklangan bolalar uchun o‘zgacha quvonch ulashdi. Tumandagi nogironligi bo‘lgan bolajonlar tarbiya topayotgan “Muruvvat” internat uyida tashkil etilgan Navro‘zda ular uchun ajoyib konsert-tomoshalari uyushtirildi.
Haqgo‘y
