2027-yil 1-yanvardan bakalavriatni tamomlagan hamshiralar va tibbiyot og‘alariga mehnatga haq to‘lashning eng kam miqdorining 1 baravari, magistraturani tamomlaganlarga 2 baravari miqdorida har oylik ustama to‘lanadi. Oilaviy tibbiyot bo‘yicha rezidenturani tamomlagan oilaviy shifokorlar hamda shu yo‘nalishdagi magistraturani bitirgan pedagog kadrlarga esa 4 baravar miqdorida ustama belgilanadi.
Shuningdek, 2027–2028-o‘quv yilidan o‘rta tibbiyot xodimlarini tayyorlashning ikki yillik dasturlariga qabul bekor qilinib, “tibbiy hamrohlik ishi” va “oliy tibbiy hamrohlik ishi” yo‘nalishlari joriy etiladi. Farmonda tibbiyot ta’limiga qabulning minimal o‘tish ballari, mutaxassislarni tayyorlash va qayta ixtisoslashtirish tartiblariga oid qator yangiliklar ham belgilangan.
