Surxondaryoda aholini sifatli va xavfsiz oziq-ovqat mahsulotlari bilan ta’minlash, chorvachilik sohasida zamonaviy hamkorlikni rivojlantirish borasida yangi imkoniyatlar yaratilmoqda.
Belarusga amaliy tashrif doirasida Surxondaryo viloyati hokimi Ulug‘bek Qosimovning Qishloq xo‘jaligi va oziq-ovqat vaziri bilan uchrashuvida vohaga sifatli mol go‘shti yetkazib berish bo‘yicha kelishuvlarga erishilgan edi.
Mazkur kelishuvlar asosida surxondaryolik tadbirkorlar tomonidan chorvachilik yo‘nalishida 4 ta korxona tashkil etilib, davlat ro‘yxatidan o‘tkazildi. Tadbirkorlar Minsk viloyatidagi chorvachilik kompleksida qoramollarni so‘yish, go‘shtni qayta ishlash, saqlash va eksportga tayyorlash jarayonlarini o‘rgandi.
Kelgusida Surxondaryoga veterinariya va sanitariya talablariga javob beradigan, “Halol” standartlari asosida tayyorlangan yuqori sifatli mol go‘shtini yetkazib berish tizimi yo‘lga qo‘yiladi.
Bu hamkorlik vohada go‘sht mahsulotlari bozorini sifatli mahsulot bilan ta’minlash, oziq-ovqat xavfsizligini mustahkamlash va chorvachilik sohasida yangi imkoniyatlar yaratishga xizmat qiladi.
