Sudyalarning huquqiy va ijtimoiy himoyasini kuchaytirish hamda sud hokimiyati mustaqilligini yanada mustahkamlashga qaratilgan yangi qonun loyihasi Qonunchilik palatasida birinchi o‘qishda qabul qilindi. «Sudyalarning maqomi to‘g‘risida»gi qonun loyihasiga ko‘ra, sudya va xalq maslahatchilari uchun amaldagi 35 yoshli yosh chegarasini 30 yoshga tushirish taklif etilmoqda.
Shuningdek, sudyalarni lavozimga tayinlash tartibini o‘zgartirish ko‘zda tutilgan. Unga ko‘ra, sudya dastlab 5 yil muddatga, keyinchalik esa muddatsiz davrga tayinlanishi mumkin. Loyihada sudya, sud raisi va uning o‘rinbosari lavozimlariga nomzodlarga qo‘yiladigan ayrim talablarni kuchaytirish, sudyalar va ularning oila a’zolarini ijtimoiy himoya qilishga oid normalar ham belgilangan.
Yana bir muhim yangilik — «iste’fodagi sudya» institutini joriy etish taklif qilinmoqda. Bunday sudyalarga professional mediatorlik faoliyati bilan shug‘ullanish huquqini berish nazarda tutilgan. Qonun loyihasi ikkinchi o‘qishga tayyorlanish jarayonida deputatlarning taklif va tavsiyalari asosida takomillashtiriladi.
