Termiz shahrida qum va chang bo‘ronlari, shuningdek, havo ifloslanishining salbiy ta’sirini kamaytirish, aholining iqlim xavflariga chidamliligini oshirishga qaratilgan amaliy choralar muhokama qilindi.
O‘zbekiston Respublikasi Ekologiya va iqlim o‘zgarishi milliy qo‘mitasi tashabbusi bilan “Termiz shahrida qum va chang bo‘ronlari hamda havo ifloslanishiga chidamlilikni oshirish” loyihasi doirasida texnik maslahat yig‘ilishi o‘tkazildi. Unda Surxondaryo viloyati Ekologiya va iqlim o‘zgarishi bosh boshqarmasi vakillari Zoom platformasi orqali ishtirok etdi.
Yig‘ilishda BMT Atrof-muhit bo‘yicha dasturi (UNEP), Finlyandiya Meteorologiya instituti (FMI) hamda O‘zbekistonning tegishli tashkilotlari vakillari qatnashdi.
Muloqot davomida xavflarni baholash, havo sifati monitoringini kuchaytirish, erta ogohlantirish tizimlarini takomillashtirish, mahalliy moslashuv choralarini amalga oshirish va manfaatdor tashkilotlar hamkorligini rivojlantirish bo‘yicha fikr va takliflar bildirildi.
