O‘zbekiston Respublikasi Mustaqilligining 35 yilligi munosabati bilan Surxondaryo viloyatidagi DXX Chegara qo‘shinlariga qarashli harbiy qismlardan birining harbiy shaharchasida harbiy xizmatchilar va ularning oila a’zolari uchun bayram tadbiri tashkil etildi.
Tadbirda Vatan sarhadlarini tun-u kun qo‘riqlayotgan harbiy xizmatchilar hamda ularning oilalari bayram bilan muborakbod etildi. Harbiylarning xizmat burchini sidqidildan ado etishida oilalarning, xususan, ayollarning sabr-toqati va qo‘llab-quvvatlashi alohida e’tirof etildi.
Bayramning madaniy qismida harbiy xizmatchilarning oila a’zolari va farzandlari ishtirokida kuy-qo‘shiqlar, raqslar va samimiy suhbatlar tashkil etilib, ishtirokchilarga ko‘tarinki kayfiyat ulashildi.
Bunday ma’naviy-ma’rifiy tadbirlar harbiy oilalar birdamligini mustahkamlash, harbiy xizmatchilarga ruhiy madad berish hamda ularning Vatan oldidagi burchini yanada mas’uliyat bilan bajarishiga xizmat qiladi.
Islomjon Muhammadaliyev,
harbiy xizmatchi
