Ayni paytda Sariosiyo tumani hokimi Odiljon Yaqubov boshchiligidagi delegatsiya Tojikiston Respublikasining Tursunzoda shahrida bo‘lib, mamlakat mustaqilligining 35 yilligi munosabati bilan tashkil etilayotgan tadbirlarda ishtirok etmoqda.
Tashrif doirasida delegatsiya a’zolari shahardagi bunyodkorlik ishlari, zamonaviy inshootlar hamda qishloq xo‘jaligi sohasidagi ilg‘or tajribalar bilan tanishmoqda. Jumladan, 500 gektar maydonda faoliyat yuritayotgan “Bog‘i Somon” uzumchilik korxonasi o‘rganilib, unda “Shohona”, “Rizamat” va “Prezident” kabi uzum navlarini yetishtirish tajribasi bilan tanishildi.
Mazkur tashrif O‘zbekiston va Tojikiston o‘rtasidagi azaliy do‘stlik, yaxshi qo‘shnichilik va o‘zaro manfaatli hamkorlik aloqalarini yanada mustahkamlashga xizmat qilmoqda.
