Surxondaryo viloyati hokimi Ulug‘bek Qosimov Angor tumanida bo‘ldi. Dastlab Angor dehqon (oziq-ovqat) bozorida Mustaqillik bayrami munosabati bilan tashkil etilgan yarmarka faoliyati ko‘zdan kechirildi. Savdo rastalarida mahalliy ishlab chiqaruvchilar va tadbirkorlar tomonidan yetishtirilgan hamda tayyorlangan mahsulotlar joy olgan.
Yarmarka jarayonida mahsulotlar narxi va aholi uchun yaratilgan qulayliklar o‘rganildi. Mas’ullarga bayram kunlarida bozorlarda mahsulotlar zaxirasini yetarli darajada shakllantirsh, narx-navoning barqarorligini ta’minlash hamda aholi ehtiyojini inobatga olgan holda savdoni tashkil etish bo‘yicha vazifalar belgilandi.
Shundan so‘ng, Madaniyat uyida “Hokim va profilaktika inspektorlari bilan uchrashuvi” o‘tkazildi. Unda hududda tinchlik va osoyishtalikni ta’minlash, jamoat xavfsizligini mustahkamlash, huquqbuzarliklarning oldini olish va profilaktika ishlarini manzilli tashkil etish masalalari muhokama qilindi.
Ayniqsa, profilaktika inspektorlarining mahallalarda aholi bilan yaqin ishlashi, muammoli oilalar va huquqbuzarlik sodir etishga moyil shaxslar bilan profilaktik tadbirlarni kuchaytirish, yoshlar o‘rtasida huquqbuzarliklarning oldini olishga qaratilgan ishlarni samarali tashkil etish zarurligi ta’kidlandi. Muhokama qilingan masalalar yuzasidan mas’ullarga aniq vazifalar belgilab berilib, ularning ijrosini ta’minlash va natijadorligini oshirish bo‘yicha topshiriqlar berildi.
