Ilm-fan va innovatsion tadqiqotlarni qo‘llab-quvvatlash mamlakat taraqqiyoti hamda zamonaviy texnologiyalarni rivojlantirishning muhim omillaridan biridir. Bu boradagi navbatdagi yutuq Termiz davlat universiteti olimlari tomonidan qo‘lga kiritildi.
Termiz davlat universiteti Kimyo fakulteti Noorganik kimyo kafedrasi mudiri, professor Kasimov Sherzod Innovatsion rivojlanish agentligi tomonidan e’lon qilingan O‘zbekiston–Belarus fundamental ilmiy loyihalar tanlovining 104-turi g‘olibi bo‘ldi.
Uning tabiiy xomashyolar asosida ichi bo‘sh tolali ultrafiltratsion membranalarni yaratish va ularning xususiyatlarini o‘rganishga bag‘ishlangan fundamental loyihasi moliyalashtirish uchun tavsiya etildi. Loyiha qiymati 1 milliard 462 million 114 ming so‘mni tashkil etadi.
Mazkur muvaffaqiyat universitetda ilmiy salohiyatni yuksaltirish, xalqaro ilmiy hamkorlikni kengaytirish hamda innovatsion ishlanmalarni amaliyotga tatbiq etish yo‘lidagi muhim qadamlardan biri bo‘ldi.
