Maktabgacha ta’limni rivojlantirish va bolalar uchun zamonaviy ta’lim muhitini yaratish yo‘lidagi ishlar Termiz tumanida izchil davom etmoqda.
Termiz tumani “Istiqlol” mahallasida 120 o‘rinli 18-sonli davlat maktabgacha ta’lim tashkilotining rekonstruksiya qilingan binosi foydalanishga topshirildi. Mahalliy budjetdan ajratilgan 1 milliard 500 million so‘m mablag‘ evaziga zamonaviy talablar asosida yangilangan muassasa barcha zarur sharoitlar bilan jihozlandi.
Ochilish marosimida tuman hokimi Shuxrat Qalandarov ishtirok etib, ushbu loyiha maktabgacha ta’lim qamrovini kengaytirish va bolalarning sifatli ta’lim olishi uchun muhim qadam ekanini ta’kidladi.
Yangi bog‘chaning ishga tushirilishi natijasida mahalladagi 120 nafar bola maktabgacha ta’lim bilan qamrab olinadi. Natijada tumanda maktabgacha ta’lim qamrovi 88 foizga yetadi.
