Surxondaryo viloyatida o‘quvchilar o‘rtasida kitobxonlik madaniyatini yuksaltirish, yoshlarning ma’naviy-intellektual salohiyatini oshirishga qaratilgan “Eng faol kitobxon o‘quvchi” tanlovining viloyat bosqichi bo‘lib o‘tdi. Mazkur tanlovda tuman va shaharlardan saralab olingan eng faol kitobxon o‘quvchilar o‘zaro bellashib, o‘qigan asarlari, adabiyotga bo‘lgan qiziqishi hamda bilim saviyasini namoyon etdilar.
Ishtirokchilar 2 ta shart asosida baholandi. Jumladan, test sinovi orqali ularning Vatanimiz tarixi, milliy va umuminsoniy qadriyatlar, buyuk alloma va adiblarimiz hayoti hamda ijodi bo‘yicha bilimlari sinovdan o‘tkazilgan bo‘lsa, tezkor savol-javob sharti orqali ishtirokchilarning mantiqiy fikrlashi, hozirjavobligi va kitobxonlik saviyasi baholandi. Yakunda eng yuqori natijalarni qayd etgan ishtirokchilar g‘olib va sovrindorlar safidan joy oldi hamda munosib taqdirlandi.
