“Obod xonadon, obod ko‘cha, obod mahalla” shiori ostida Bandixon tumanida ommaviy hasharlar keng quloch yoymoqda. Mazkur ezgu tashabbus doirasida tuman hokimi Abdumalik Allamuradov boshchiligida barcha mahallalarda keng ko‘lamli obodonlashtirish ishlari izchil amalga oshirilmoqda.
Shuningdek, “Birdamlik” mahallasida nuroniylar tomonidan xonadonma-xonadon yurib, aholi o‘rtasida tomorqa madaniyatini shakllantirish, yer maydonlaridan unumli foydalanish hamda bahorgi ekinlarni o‘z vaqtida ekish bo‘yicha targ‘ibot tadbirlari amalga oshirildi.
Hasharlar davomida yo‘llar atrofi va jamoat joylari tozalanib, mahallalar, maktab va maktabgacha ta’lim muassasalari hududlari tartibga keltirilmoqda. Yangi daraxt ko‘chatlari ekilib, mavjud yashil hududlar parvarish qilinmoqda.
Xususan, bugun tumandagi “Birdamlik mahallasi”ning Mardlik ko‘chasida fuqarolar tashabbusi bilan yo‘lning chuqur hosil bo‘lgan qismlarini hashar yo‘li orqali betonlash ishlari olib borilmoqda. Mahalla nuroniylari aholini birlashtirib, hasharchilarni ezgu duolar bilan qo‘llab-quvvatlamoqda.
Hasharchilar uchun milliy qadriyatlarimizga xos tarzda xomiylar tomonidan osh pishirildi. Bunday hamjihatlik va birdamlik yurtdoshlarimizning o‘z mahallasiga, o‘z ko‘chasiga bo‘lgan mehr-muhabbatining yorqin ifodasidir.
