Sog‘lom hayot sari 5 ming qadam

Bugungi kunda sog‘lom turmush tarzini shakllantirishda eng oddiy, ammo samarali jismoniy faollik — piyoda yurish muhim ahamiyat kasb etadi. Mutaxassislar fikricha, har kuni muntazam yurish inson salomatligini mustahkamlab, yurak-qon tomir kasalliklari xavfini kamaytiradi, ruhiy holatni yaxshilaydi hamda umumiy hayot sifatini oshiradi. Shu bois, aholi o‘rtasida piyoda yurishni targ‘ib etishga qaratilgan tadbirlar tobora keng tus olmoqda.
Ana shunday tadbirlardan biri Qumqo‘rg‘on tumanida erta tongda tashkil etilgan “Sog‘lom hayot uchun 5 ming qadam” marafoni bo‘ldi. Unda tuman hokimining o‘rinbosari N. Allanazarov, tuman tibbiyot birlashmasi xodimlari, tashkilot va korxona vakillari, nuroniy otaxon va onaxonlar hamda faol yoshlar ishtirok etdi.
Marafon doirasida ishtirokchilar “Alpomish” sport majmuasida belgilangan 5 ming qadam masofani piyoda bosib o‘tdilar. Shuningdek, tadbir davomida ertalabki badantarbiya mashg‘ulotlari tashkil etilib, qatnashchilarga sog‘lom turmush tarziga oid tavsiyalar berildi.