Prezident Shavkat Mirziyoyev videoselektor yig‘ilishida kambag‘allikni qisqartirish va aholi bandligini ta’minlash bo‘yicha ko‘rilayotgan choralarni muhokama qildi. 232 ming gektar yer ajatilgani natijasida 770 ming kishi daromad manbayiga ega bo‘lgan bo‘lsa-da, tajriba va bozor topishdagi qiyinchiliklar sabab ayrimlarida daromad pastligicha qolmoqda.
Termiz tumanida tashkil etilgan Tomorqa maktabi aholiga ilmiy yondashuv asosida yerda samarali ishlashni, yiliga 5 martagacha ekin ekishni o‘rgatmoqda. 3 ming ehtiyojmand fuqaroga sitrus, anjir, xurmo va gul yetishtirish bo‘yicha o‘quv kurslari o‘tkazildi.
Ushbu tajriba respublika bo‘ylab joriy etilsa, dehqonlar daromadi 4–5 baravar oshishi ta’kidlandi. Shu bois, har bir viloyatda kamida 5 ta Tomorqa maktabi tashkil etilib, mahsulotni kafolatli sotish uchun “Eksportchi kooperativlari” tuziladi.
