Uzun tumani tibbiyot birlashmasida yurak-qon tomir kasalliklarini tashxislash va davolashda mobil angiograf xizmatidan keng foydalanilmoqda. Ushbu xizmat orqali koronar angiografiya yordamida yurak arteriyalaridagi torayish va to‘siqlar aniqlanadi. Endilikda tumanning o‘zida bemorlarga joyida tashxis qo‘yish, davolash va stent o‘rnatish imkoniyati yaratildi.
Mobil angiograf xizmati tuman va shahar hududlarida ko‘rsatilayotgani aholi uchun katta qulaylik bo‘lib, viloyat yoki respublika markazlariga borish zaruratini kamaytirdi. Ayniqsa, uzoq hududlarda yashovchi bemorlar uchun bu katta yengillik hisoblanadi. Joriy yil davomida Surxondaryoda 1 000 nafarga yaqin fuqaro mobil angiograf xizmatidan tibbiy ko‘rikdan o‘tkazilishi rejalashtirilgan. Bu yurak sog‘lig‘ini yaxshilash va kasalliklarni erta aniqlashda muhim qadamdir.
