“Dolzarb 90 kun” dasturi doirasida yozgi ta’tilni mazmunli o‘tkazish, yosh avlodning bandligini ta’minlash, ularda tadbirkorlikka bo‘lgan qiziqishni oshirish va amaliy ko‘nikmalarni shakllantirish maqsadida tizimli ishlar amalga oshirilmoqda.
Angor tumanidagi 1-sonli umumta’lim maktabining yuqori sinf o‘quvchi qizlari “Charos Angor” oilaviy korxonasida amaliyot o‘tamoqda. Tuman Maktabgacha va maktab ta’limi bo‘limi hamda mahalliy tadbirkorlik subyekti o‘rtasidagi hamkorlik asosida tashkil etilgan ushbu tashabbus orqali o‘quvchilar tikuvchilik yo‘nalishida zaruriy kasbiy bilim va ko‘nikmalarni egallamoqdalar.
Ular korxona faoliyati bilan bevosita tanishish, tikuv mashinalari bilan ishlash, mahsulot tayyorlash bosqichlarini o‘rganish orqali kelgusidagi kasb tanloviga asos yaratmoqda. Bu kabi tashabbuslar o‘quvchi-yoshlarning hayotga tayyor holda chiqishiga, ularning ijtimoiy faolligi va maqsadga yo‘naltirilganligini oshirishga xizmat qilmoqda.
