Bugungi yoshlar hayotini ijtimoiy tarmoqlarsiz tasavvur qilish qiyin. Ayniqsa, Instagram kabi platformalar yosh avlod orasida eng mashhur bo‘lib ulgurdi. Shu bilan birga, kutubxonalar bo‘m-bo‘sh, o‘quv zallari huvillab qolmoqda. Bu hodisa shunchaki texnologik taraqqiyot natijasimi yoki chuqurroq ijtimoiy muammo?
Avvalo, Instagram yoshlar uchun nafaqat muloqot maydoni, balki o‘zini ko‘rsatish, mashhurlikka erishish, yangiliklardan tezkor xabardor bo‘lish imkoniyatini beradi. U yerda yorqin suratlar, qisqa videolar, trendlar, memlar, musiqalar orqali odamlar e’tiborini tortish va “like” yig‘ish imkoniyati bor. Bu esa insondagi tan olinish istagini bevosita qondiradi.
Aksincha, kutubxona sokin, tartibli, diqqatni talab qiluvchi muhitdir. Bu yerda natija tez emas — bilim olish vaqt, sabr va tirishqoqlik ortidan keladi. Ko‘pchilik uchun bu yo‘l zerikarli ham. Ayniqsa, darhol natija, darhol zavq izlaydigan yoshlar uchun.
Biroq shuni unutmaslik kerakki, Instagram vaqtincha zavq bersa, kutubxona abadiy bilim, ilhom beradi. Ijtimoiy tarmoqlarda ko‘rganlarimiz kechagina trend bo‘lgan bo‘lsa, bugun unutilgan. Kitobda esa har bir sahifa — inson tafakkurini boyitadigan, hayotni chuqurroq tushunishga chorlaydigan manba.
Xulosa qilib aytganda, kutubxonaning gavjum bo‘lishi uchun biz avvalo, kitobxonlik madaniyatini qayta tiklashimiz kerak. Instagramni butunlay rad etish emas, balki uni me’yorida ishlatish, oqilona foydalanib, aniq maqsadga yo‘naltirish — eng to‘g‘ri yondashuv bo‘ladi. Zero, haqiqiy rivoj — “like” emas, bilim orqali keladi.
Mohinur YO‘LDOSHEVA
