O‘rim boshlandi

Qilingan mehnat-u harakatlar meva beradigan muddat yetdi. Erta bahorda ekilgan don unib o‘sdi, hosilga kirib, pishib yetildi. Mana endi o‘rimni boshlasa ham bo‘ladi. Viloyatimizda g‘alla o‘rimi mavsumiga tayyorgarlik jarayoni qizg‘in davom etmoqda. Mirishkor dehqonlar hosil yig‘im-terimiga puxta tayyorgarlik ko‘rayotgan bir paytda, Al-Hakim at-Termiziy majmuasida mavsum oldidan ehson tadbiri tashkil etildi.
Tadbirda viloyat hokimi Ulug‘bek Qosimov, huquqni muhofaza qiluvchi organlar, iqtisodiyot va qishloq xo‘jaligi sohasi mutasaddilari, tuman hokimlari, soha faxriylari, nuroniylar hamda diniy soha vakillari ishtirok etdi.
Viloyat rahbari mavsumni yuqori uyushqoqlikda tashkil etish, xalqimiz rizq-ro‘zi hisoblangan g‘alla hosilini yo‘qotishlarsiz va o‘z vaqtida yig‘ib olish lozimligini ta’kidladi. Shu bilan birga, bu jarayonda barcha imkoniyat va resurslarni safarbar etish, tajribali mutaxassis va faxriylarning maslahatlariga tayanish muhimligiga e’tibor qaratdi. Tadbir so‘ngida yurt tinchligi, hosillar barakasi va mavsumning xayrli o‘tishi uchun duo qilindi hamda Qur’on tilovat qilindi.