Surxondaryo viloyatida tadbirkorlik subyektlarining qonuniy faoliyatini qo‘llab-quvvatlash, ularning muammolarini hal etish va noqonuniy aralashuvlarning oldini olish maqsadida amaliy choralar ko‘rilmoqda. Bu borada tashkil etilgan maxsus Shtab faoliyati doirasida qonunbuzarlik holatlari tahlil qilinib, nazorat organlari ishi ustidan qat’iy nazorat o‘rnatildi.
Viloyat hokimi Ulug‘bek Qosimov tadbirkorlar bilan o‘tkazgan navbatdagi onlayn qabulida mazkur masalaga alohida e’tibor qaratildi. Qayd etilganidek, tadbirkorlar faoliyatini qonunga zid ravishda tekshirgan 74 nafar mansabdor shaxs aniqlanib, ularga nisbatan belgilangan tartibda javobgarlik choralari ko‘rildi.
Qabul davomida shahar va tumanlar studiyalari orqali 55 nafar tadbirkorning 61 ta muammosi eshitildi. Ularni joyida hal etish maqsadida 25 dan ortiq mutasaddi rahbar mas’ul etib biriktirildi.
Shuningdek, avvalgi qabullarda bildirilgan murojaatlarning ijrosi, mehnat migratsiyasidan qaytgan fuqarolarni ish bilan ta’minlash, tadbirkorlikka o‘rgatish hamda “Kambag‘allikdan farovonlik sari” dasturi doirasida amalga oshiriladigan vazifalar ham belgilab olindi.
