Termiz iqtisodiyot va servis universitetida “Profilaktik tibbiyotning dolzarb muammolari: kasalliklar profilaktikasidan yuqori texnologiyali davolashgacha” mavzusidagi respublika ilmiy-amaliy anjumani boʻlib oʻtdi. Ikki kun davom etgan anjumanda Sog‘liqni saqlash vazirligi vakillari, respublikaning barcha hududlaridan kelgan tibbiyot xodimlari, professor-o‘qituvchilar, yosh tadqiqotchilar hamda Tojikistonning nufuzli oliy ta’lim muassasalaridan tashrif buyurgan mehmonlar ishtirok etdilar.
Anjuman doirasida sog‘liqni saqlash sohasidagi zamonaviy yondashuvlar, profilaktika tibbiyotining dolzarb masalalari, erta tashxis va yuqori texnologiyalar asosidagi davolash usullari muhokama qilindi.
Turli mavzular bo‘yicha seksiya majlislari tashkil etilib, yosh olimlar o‘z ilmiy ishlari va innovatsion g‘oyalari bilan ishtirok etdilar. Tadbir davomida O‘zbekiston va Tojikiston oliy ta’lim muassasalari o‘rtasida hamkorlikni kengaytirish, talabalar va professor-o‘qituvchilar almashinuvi bo‘yicha kelishib olindi. Anjuman yakunida maxsus rezolyutsiya qabul qilinib, profilaktik tibbiyotni rivojlantirishga qaratilgan muhim taklif va tavsiyalar ilgari surildi.
