Navro‘z — yangi kun, yangi yilga debochadir. Bu kun dillarga xushnudlik, ajib bir kayfiyat baxsh etadi. Bahor o‘z ishini qilib, borliqni kelinchakmisol yasantirganidanoq Navro‘zga taraddud boshlangandek bo‘ladi.
Termiz shahrida bahor nafasi, Navro‘z shukuhi hukmron. “Navro‘z” umumxalq bayrami munosabati bilan o‘tkaziladigan viloyatning asosiy bayram sayli San’at saroyida erta tongdan boshlanib, qizg‘in tus olgan. Voha ahli va mehmonlarni o‘z bag‘riga chorlayotgan sayilda qizg‘in tayyorgarlik ko‘rilgan. Bu yilgi sayillar har yilgidan o‘zgacha tarzda o‘tkazilmoqda. Qayga boqmang, o‘zingizni gullar qurshovida his etasiz. Qushlar, bulbullarning shirali ovozi quloqlaringiz ostida jarang sochayotgandek, oyoqlaringiz o‘ziga bo‘ysunmaydi. Beixtiyor tomosha zavqiga berilib, San’at saroyi bo‘ylab kezishni boshlaysiz.
Markazda musiqali drama hamda qo‘g‘irchoq teatrlarining konsert tomoshalari bayramni yanada qizitib, barchani sho‘x-shodon raqsga chorlasa, folklor jamoalar ishtirokidagi ko‘rik-tanlov esa e’tiboringizni jalb etmay qo‘ymaydi.
