Ichki turizmni rivojlantirish, mavjud turizm obyektlariga aholining e’tiborini jalb qilish, sohadagi tadbirkorlik subyektlarini qo‘llab-quvvatlash va turoperator hamda turagentlarni iste’molchilarga tanishtirish maqsadida “Boysun bahori” turizm majmuasida “Ichki turizm yarmarkasi” tashkil qilindi.
Yarmarka doirasida milliy madaniyat markazlari, viloyatning o‘ziga xos turistik maskanlari, madaniy meros obyektlari va biologik xilma-xillik namoyish etildi. Shuningdek, hunarmandchilik mahsulotlari ko‘rgazmalari uyushtirilib, tashrif buyuruvchilarga mahalliy hunarmandlar tomonidan ishlab chiqarilgan mahsulotlar taqdim qilindi.
Tadbir davomida turizm sohasi vakillari o‘rtasida “B2B” uchrashuvlari o‘tkazilib, o‘zaro hamkorlikni rivojlantirish bo‘yicha bir qator shartnoma va kelishuvlar imzolandi. Ushbu yarmarka ichki turizmni yanada rivojlantirish, yangi turistik yo‘nalishlarni kengaytirish hamda sohadagi tadbirkorlik subyektlarini qo‘llab-quvvatlashga xizmat qiladi.
