Termiz “Inklyuziv” shaharga aylanmoqda

So‘nggi paytlarda ko‘plab muhokamalarga sabab bo‘layotgan mavzu — inklyuziyadir. Ho‘sh, inklyuziv ta’lim yoki nogironligi bor odamlarni qabul qilish, ularni jamiyatga qo‘shish haqida, ularni qabul qilish borasida qizg‘in munozaralarga kirishishdan avval, biz bunga tayyormimiz? Ko‘zi ojiz, nogironligi bor fuqarolarning shahrimizda, davlat idoralari-yu, ta’lim muassasalarida erkin harakatlanishlari uchun shart-sharoit, imkoniyat bormi? Ayni shu savol ko‘ndalang qo‘yilganda, tilimizni tishlashimiz aniq.
Davlatimiz rahbarining bergan topshiriqlari ijrosini ta’minlash maqsadida Termiz shahri Alisher Navoiy ko‘chasini ijtimoiy ko‘chaga aylantirish bo‘yicha ishlar olib borilmoqda. Mazkur ko‘chada ko‘zi ojiz va zaif ko‘ruvchi insonlar uchun ovozli svetoforlar, sariq rangli yo‘lakchalar tashkil qilinmoqda.
Shuningdek, 2025-yilda ijtimoiy ko‘chaga aylantirish uchun At-Termiziy ko‘chasi tanlab olingan bo‘lib, hozirda ishlar boshlangan. Shahar bo‘ylab, ko‘p qavatli uylarning yo‘lak va liftlarini ko‘zi ojiz insonlar uchun moslashtirish, davlat tashkilotlarining kirish qismida sariq yo‘laklar va brayl alifbosidagi ko‘rsatkichli bino xaritalari tashkil etish ishlari davom etmoqda.