Tashlandiq joy obod bo‘ladi

Viloyatimiz rahbari joriy yil 19-yanvar kuni Termiz shahri mahallalarida infratuzilma bilan tanishuvi davomida “Tinchlik” mahallasi hududida joylashgan kollektorni zamonaviy yopiq drenajga aylantirish orqali tadbirkorlik uchun keng imkoniyatlar yaratish hamda ish o‘rinlarini ko‘paytirish topshirig‘ini bergan edi.
Bir necha kun o‘tib, mazkur loyiha qurilishiga start berildi. Unda Surxondaryo viloyati hokimi Ulug‘bek Qosimov, loyiha tashabbuskorlari, shahar mutasaddilari hamda faollar va nuroniylar ishtirok etdi.
Loyiha doirasida kollektorning 1,2 kilometr qismida sizot suvlarining chiqib ketishini ta’minlagan holda ustini yopish orqali qurilish ishlari amalga oshiriladi. Bunda kollektor faoliyatini to‘xtatmasdan hamda yerning meliorativ holatini saqlagan holda bo‘sh maydonlardan samarali foydalanish imkoniyati yaratiladi.
Hududda maishiy xizmat ko‘rsatish, savdo va avtoservis joylari hamda boshqa obyektlar qurilishi ko‘zda tutilgan bo‘lib, ko‘plab ish o‘rinlari yaratish bilan birga tashlandiq joyning obod bo‘lishiga, infratuzilmaning yaxshilanishiga erishiladi.