Bola ona tarbiyasiga olib berildi

Oila farzand bilan, bola kulgusi bilan butun. Ammo ba’zi ota-onalar farzandlari quvonchini o‘g’irlashadi, oilani bo‘lib, dunyoga keltirishgan norasidalarni tirik yetimga aylantirishadi. Ajrim yoqasida esa farzand talashish boshlanadi. Bu o‘rtada esa bolalarga qiyin. Ba’zi otalar zo‘ravonlik ila farzandini olib qo‘yib, turmush o‘rtog’iga nohaqlik qiladi.
Boysunda ham oilalardan birida xuddi shunday holat takrorlandi. Byuroning Boysun tuman bo‘limi ish yurituviga kelib tushgan ijro hujjatiga ko‘ra, oiladagi tushunmovchiliklar oqibatida tumanning Mustaqillik mahallasida yashovchi Sobir Jo‘rayevlar xonadoniga kelin bo‘lib tushgan Nazira ota uyiga chiqib ketishga majbur bo‘ladi. Oilada dunyoga kelgan besh yoshli o‘g‘il farzand esa ota tarbiyasida qoladi.
Bolani ona tarbiyasiga qaytarish to‘g‘risidagi da’vo arizasi ochiq sud majlisida ko‘rib chiqilib, bolani ona mehri va tarbiyasiga muhtojligini inobatga olgan holda sudning hal qiluv qarori bilan bolani ona tarbiyasiga qaytarish zarurligi belgilandi.
Sud qarori ijrosini ta’minlashga mas’ul bo‘lgan Byuroning tuman bo‘limi davlat ijrochilarining sa’y-harakati bilan bola sog‘-salomat ona tarbiyasiga olib berildi.