Dunyoning qay burchagida bo‘lmaylik, o‘zbek millatiga mansub qiyofani darrov taniymiz, gap-so‘zlarini eshitish esa xuddi yaqinimizni uchratgandek quvonch bag‘ishlaydi. Ayniqsa, bu insonlar bilan bir viloyat, bir tuman va qishloqdan bo‘lsak, quvonch-u hayajonimiz yana bir karra oshadi. Rossiya Federatsiyasi Ryazan viloyati “Temir yo‘lchi” tumanida migratsiyadagi yoshlar o‘rtasida ham xuddi shunday holat kuzatildi. Yoshlar oyligi doirasida “Yangi O‘zbekiston yoshlari birlashaylik” shiori ostida Termiz shahar hokimi tashabbusi bilan migratsiyadagi yoshlar o‘rtasida “Mini futbol” sport o‘yini bo‘yicha “YOSHLAR FESTIVALI” musobaqasi tashkil etildi.
Musobaqa qiziqarli, murosasiz kurashlarga boy bo‘ldi. Asosiysi, ishtirokchilar maroq ila to‘p surdilar. Sport o‘yinidan so‘ng, bayram dasturxoni tashkil etdi. G‘oliblarning oila a’zolariga Termiz shahar hokimi O‘. To‘rayev boshchiligida sektor rahbarlari ishtirokida esdalik sovg‘alari topshirildi.
Migratsiyadagi vohadoshlarimiz ham masofaviy tarzda jarayonda ishtirok etishdi va o‘z fikr-mulohazalarini, taklif va tashakkurlarini bildirib o‘tdilar.
Sarvinoz Yaxshiboyeva,
TerDU talabasi
