Iqtidorlar kashf etildi

Ona zamin ohanglari quloqqa hush yoqadi. Chanqovuz ohangi, do‘mbira sadosi kishi qalbiga yaqin, qandaydir o‘tmish va bugunni bog‘lab turuvchi rishta kabi xotiralarni, qalb torlarini chertib yuboradi. Muhimi, ohanglarni sel bo‘lib tinglash, dardni, sadoni his etish lozim. O‘z navbatida bu chaluvchi sozandadan ham mahorat talab etadi.
Xalq og‘zaki ijodi sanalmish milliy kuy-qo‘shiqlarimiz ham ayni tushunchalarga egizakdek gap. Shunchaki tomoshaga berilib, milliylikka qaytasiz, o‘zlikni tanib, o‘zbekligingiz bilan faxrlanasiz. “Ona zamin ohanglari” folklor-etnografik jamoalarining respublika teletanlovining viloyat bosqichi ham ana shunday ruhda bo‘lib o‘tdi.
Qumqo‘rg‘on tumanida o‘tkazilgan tanlovda bir-biridan ajoyib chiqishlar namoyishi yangidan-yangi iqtidorlarni, iste’dodlarni kashf etishga xizmat qildi.