Quvonchbek guvohnomaga ega bo‘ldi

Adliya vazirligi tashabbusi bilan o‘tkazilayotgan “Hech bir shaxs hujjatsiz qolmaydi” huquqiy aksiyasi doirasida e’tiborga molik ishlar amalga oshirilmoqda. Tug‘ilganlik haqida guvohnoma yoki fuqarolik pasporti yo‘qlar, qonuniy nikohdan o‘tmaganlar loyiha bahonasida hujjatli bo‘lib, bir muammosi ariyotgani aholiga katta qulaylik yaratayotir.
Angor tumanining “Kattaqum” mahallasida yashovchi fuqaro Umida opaning 2015-yilda tug‘ilgan o‘g‘li tug‘ruqxonadan tashqarida (xonadonida) tug‘ilgani uchun tug‘ilganlik haqida guvohnoma ololmagan edi. Buni qarangki, o‘sha go‘dak vaqt o‘tib, bugun 9 yoshda. To‘qqiz yoshli bolaning borligi rasman tasdiqlanmagani uning hayotida qiyinchilik tug‘dirmagan deysizmi, albatta, tug‘dirgan. Aksiya sabab Quvonchbek ham hujjatsiz qolmadi, uning ham tug‘ilishi rasmiylashtirilib, guvohnomasi shaxsan adliya vaziri A.Toshqulov tomonidan topshirildi.