Muddatidan oldin talaba bo‘ldi

Ayni pallada maktab bitiruvchilarning hayajoni cheksiz. Sababi yangi o‘quv yilida hayotlaridagi muhim va hal qiluvchi qadamni tashlaydilar. Buning uchun ozmuncha ter to‘kib, o‘qib o‘rganishdi axir. Til kurslari, mutaxassislik va majburiy fan bloklari bor diqqat-e’tiborni o‘qishga qaratish lozimligini ko‘rsatadi. Termiz shahridagi 12-umumta’lim maktabi o‘quvchisi Abdushukur Xalimov muddatidan ilgari xorijiy universitetlar talabasi bo‘lganligi haqida xabar bergan bo‘lsak, ushbu maktabning yana ikki nafar o‘quvchisi ham ana shunday baxtga muyassar bo‘lishdi.
Durdona Kattaqulova Yaponiya Xalqaro universitetiga, Bobur Ismoilov esa Amerikaning Arizona universitetiga talabalikka qabul qilindi. Bu yangi o‘quv yilida yoshlarni Yaponiyayu Amerika davlatlari kutadi degani. Bu xabar qulog‘iga chalingan yosh borki, tengdoshlariga havas qilishayotgani aniq. Havas orzuni amalga oshirishdagi ilk qadamdir. Shunchaki oldinga intilib, inson o‘zini sinab ko‘rishdan to‘xtamasligi kerak. Ajab emas, siz ham ana shunday muvaffaqiyatga erishsangiz.