Uzumchilik – doimiy daromad manbai

Uzumchilikda surxondaryoliklarning boy tajribasi bor. Voha iqlimi, tuprog‘i, ayniqsa, uzum yetishtirish uchun xos va mos bo‘lgan hudud. Shu sababdan ham voha bo‘ylab kezar ekansiz, keng dala maydonlarida yastanib yotgan uzumzorlarga ko‘zingiz tushadi. Yoz oxirlari, kuz mavsumida esa charos uzumlarning marjondek tizilib turgani ko‘zingizni quvnatib, ishtahangizni ochishi aniq. Angorlik Ibrohim Allanazarov ham tomorqasidan samarali foydalanish maqsadida imtiyozli kredit olib, 40 sotix maydonda uzum yetishtirni yo‘lga qo‘ydi.
Innovatsion usulda uzumning “Kelin barmoq”, “Kishmish”, “Mersedes” va “Rizamat ota” navlaridan 350 tup ekdi. Uzumlari o‘tgan yili hosil berib, bog‘bonning sa’y-harakatlari besamar ketmaganini isbotlagan bo‘lsa, kelgusi yilda ishlari yanada rivoj topishiga ishonchini oshirdi. Oila a’zolari bilan ishlasa-da, qo‘shimcha ishchiga ehtiyoj tug‘ilgani uchun Ibrohim aka mavsumiy ish o‘rni ham yaratgan. Qolaversa, uzumchilik bilan kifoyalanmay, asalarichilikni ham yo‘lga qo‘ygani oila uchun qo‘shimcha daromad manbai bo‘lib xizmat qilmoqda.