Ijodiy anjuman o‘tkazildi

Termiz Iqtisodiyot va servis universitetida o‘zbek adabiy muhitida yorqin iz qoldirgan va hozirda ijod qilayotgan yozuvchi va shoirlarning ijodi, bosib o‘tgan hayot yo‘liga bag‘ishlangan ijodiy anjuman bo‘lib o‘tdi. Tadbirni Xalqaro adabiyot, san’at, madaniyat va ijtimoiy fanlar Akademiyasi Butunjahon xalq ijodkorlari uyushmasining a’zosi, shoir To‘ramurod Rahmonov olib bordi.
U so‘zga chiqib, adabiyot olamida yorqin iz qoldirgan O‘zbekiston Xalq yozuvchilari Tohir Malik, O‘tkir Hoshimov, Shukur Xolmirzayev, Tog‘ay Murod va shoirlardan Muhammad Yusuf, Sirojiddin Saidov, Eshqobil Shukur kabi ko‘plab ijodkorlarining hayoti va ijodiy faoliyati haqida to‘xtaldi. Hamda o‘z ijod namunalaridan o‘qib eshittirdi.
Albatta, adabiyot, she’riyat haqidagi suhbat hech kimni e’tiborsiz qoldirmaydi. Shu jihatdan oliygoh o‘qituvchi va talabalari o‘zlarini qiziqtirgan barcha savollarga atroflicha javoblarni oldilar. Ijodiy uchrashuv samimiy ruhda o‘tib, barchaning xotirasida uzoq muddatgacha saqlanib qolsa, ajab emas.
Ijodiy anjuman bu bilan nihoyalanmadi, balki teatrda davom etdi. Ishtirokchilar Surxondaryo viloyat musiqali drama teatriga tashrif buyurishdi. U yerda namoyish etilgan “Uydagi gap ko‘chada” komediya janridagi spektakli namoyish etildi va ushbu spektakl tomoshabinlarga oʻzgacha хushkayfiyat ulashdi.