Surxondaryo viloyatining qo‘shni Tojikiston bilan chegaradosh Uzun tumanida “Uzun” temir yo‘l vokzalining yangi binosi foydalanishga topshirildi. Shu munosabat bilan bo‘lib o‘tgan tantanali marosimda davlat va jamoat tashkilotlari vakillari, temir yo‘lchilar va faxriylari, yoshlar, ommaviy axborot vositalari xodimlari ishtirok etdi.
Keyingi yillarda mamlakatimiz temir yo‘l tizimida yuz berayotgan o‘zgarishlar yo‘lovchilarga xizmat ko‘rsatish sifati va samaradorligini oshirishda muhim omil bo‘layotgan bir paytda ayni maqsadda hududlarda zamonaviy vokzallar bunyod etilib, yangi yo‘nalishdagi poyezdlar qatnovi yo‘lga qo‘yilib, vagonlarda ham barcha sharoitlar yaratilmoqda.
Mamlakatimizning eng chekka va olis tumanida qurilib, ishga tushirilgan “Uzun” temir yo‘l vokzali mahalliy aholi va boshqa yo‘lovchilar uchun ajoyib tuhfa bo‘ldi. Shu paytgacha yo‘lovchilarga xizmat ko‘rsatib kelgan temir yo‘l bekati o‘rnida barcha qulaylikka ega muhtasham vokzal qad rostladi.
