Yangi NMTT foydalanishga topshirildi

Farzandimizni davlat yoki nodavlat maktabgacha ta’lim tashkilotiga berish har bir ota-onaning tanlovi. Muhimi, bog‘chada zarur shart-sharoitlar bo‘lishi, talabga yarasha ta’lim-tarbiya berilishi lozim. Ayniqsa, til o‘rgatilsa, o‘g‘il-qizlarimiz bog‘chadanoq kelajagi uchun birinchi qadamni tashlagan darajada bo‘lishlari lozim. Axir bejizga bola 5 yoshigacha hayoti uchun kerakli tasavvur va ko‘nikmalarni olib bo‘ladi deyishmaydi-ku. Ana shunday bilish, tanishuv jarayonida ota-ona munosib turtkini berib, qo‘llab-quvvatlashi lozim. Talabga munosib taklif sifatida Termiz shahrining “Nurli kelajak” mahallasida umumiy loyiha qiymati qariyib 4,0 milliard soʻm boʻlgan, 90 oʻrinli “Parvozga shay bolalar-3” nomli yangi nodavlat maktabgacha taʼlim tashkiloti ochilib, foydalanishga topshirildi.
Mazkur tantanali tadbirning ochilish marosimida Termiz shahar hokimi Oʻ.Toʻrayev ishtirok etib, tizimda amalga oshirilayotgan islohotlar, nodavlat maktabgacha taʼlim muassasalarini tashkil etish boʻyicha davlatimiz rahbari tomonidan yaratib berilayotgan keng imkoniyat va imtiyozlar toʻgʻrisida soʻz yuritdi. Tadbirda nuroniylar, mahalla faollari, soha masʼullari va OAV vakillari ishtirok etishdi. Yangi yil bayrami arafasida ushbu muassasaning foydalanishga topshirilishi ota-onalar va bolajonlar quvonchiga quvonch qoʻshdi.