Bayram shukuhi arzonlashtirilgan savdo yarmarkalaridan seziladi

Dekabr oyining boshlanishi bilan qalbimizni yangi yil shukuhi chulg‘ab oladi. Bunga qo‘shimcha ravishda ko‘chalarda, tashkilot va idora binolari oynalarida solingan suratlar, minglab yoritkichlar bayram yaqinligini eslatib turgandek bo‘ladi. Kun sanab, yangi yilni munosib kutib olish uchun hozirlik ko‘ra boshlaymiz. Albatta, hozirligimiz bozordan bozor-o‘char qilish bilan boshlanadi. Yig‘ib-tergan mablag‘imizga ro‘yhatimizdagi oziq-ovqat va masalliqlarni xarid qilishga tutinamiz. Bozorlardagi arzonlashtirilgan savdo yarmarkalaridagi sifatli oziq-ovqat mahsulotlari orqali bayram shukuhi yanada sezilishi aniq. Buni Surxondaryo viloyati hokimi Ulug‘bek Qosimov rahbarligida o‘tkazilgan navbatdagi “Hokimlik soati”da ta’kidlab o‘tar ekan, barcha birdek nishonlaydigan bayramni risoladagidek o‘tkazish uchun ko‘cha va hiyobonlarni hozirdan bayramga mos ravishda bezash, bozorlarda tashkil etilgan arzonlashtirilgan savdo yarmarkalaridagi sifatli oziq-ovqat mahsulotlar sotuvini yo‘lga qo‘yish va nazoratga olish lozimligi haqida to‘xtaldi.
Viloyat, shahar va tumanlar hokimliklari studiyalari orqali mutasaddilar bilan davlat rahbarining viloyatimizga tashrifida belgilab berilgan vazifalar ijrosi, ijro intizomi, faollar ko‘tarayotgan muammolarning hal etilishi hamda “Yangi yil” bayramiga tayyorgarlik masalalari muhokama qilindi.
Kun tartibidagi masalalar yuzasidan mutasaddi rahbarlarning axborotlari tinglanib, zaruriy vazifalar belgilab berildi. Shuningdek, tegishli mutasaddilarga yangi yil bayrami munosabati bilan muhtojlar va uyda yotib qolgan bemorlar holidan xabar olish, joylarda aholi, ayniqsa, bolajonlar uchun katta bayram dasturlarini tashkil etish va ko‘tarinki kayfiyatda nishonlash topshirildi.