30 ta tez yordam mashinalari topshirildi

Issiq jonning issig‘i chiqsa, tezda tez yordam raqamlarini teramiz. Kutganimizdek, tezlik bilan birinchi yordam ko‘rsatilib, shifokorlar jonimizga ora kirishadi. Xavf chekinib, hayotimizni asrab qolishadi. Bu albatta, davlatimizda tibbiyot sohasiga qaratilayotgan e’tibor va inson qadrining nechog‘lik azizligini yana bir bor ko‘rsatgandek bo‘ladi. Qolaversa, davlat rahbarining ko‘rsatma va topshiriqlariga asosan aholiga tez tibbiy yordam ko‘rsatish tizimini takomillashtirish va sifat jihatidan yangi bosqichga olib chiqish maqsadida qator ishlar amalga oshirilayotgani ham sir emas.
Ana shunday isharning davomi sifatida Surxondaryo viloyatidagi shahar va tumanlar tez yordam bo‘limlariga 30 dona “Volkswagen Caddy” rusumli tez tibbiy yordam mashinalari topshirilganini aytish mumkin. Shu munosabat bilan Angor tumanida o‘tkazilgan tadbirda viloyat hokimi Ulug‘bek Qosimov ishtirok etdi.
Maxsus jihozlangan tez tibbiy yordam mashinalari kalitlari hududiy bo‘limlar mutasaddilariga tantanali topshirildi. Albatta, ushbu tez yordam mashinalari aholiga tez tibbiy yordam ko‘rsatish sifatini oshirishga xizmat qiladi.