Kasb-hunari qo‘l keladi

Bugungi kunda maktablarda ta’lim-tarbiya bilan birga yoshlarga kasb-hunar ham o‘rgatilishi o‘zining ijobiy natijasini bermay qolmaydi, albatta. Maktabni tamomlagan yosh o‘qishni davom ettira olmadimi, ishlashi mumkin. Shunday paytda o‘rgangan kasb-hunari qo‘l keladi.
Ushbu amaliyot Angor tumanida ham viloyat hokimining topshirig‘iga asosan yo‘lga qo‘yilgan bo‘lib, yoshlarni kasbga o‘rgatish, xususan, ularni kasb-hunarga yo‘naltirish bo‘yicha tizimli ishlar olib borilmoqda. Tumanda faoliyat yuritayotgan yirik korxona va tashkilotlarni kasb-hunar maktablariga biriktirish amaliyoti joriy etilgan.
Tumanning “Yangi turmush” mahallasida joylashgan 1-son kasb-hunar maktabiga “Zamin Angor kluster” MJCh biriktirilgan. Tuman hokimi Qosim Mardonov hamda klaster mas’ullari kasb-hunar maktabida bo‘lib, yoshlar bilan uchrashdi. Ularning qiziqishlari va kelgusidagi rejalari bilan o‘rtoqlashdi. Kasb-hunar maktabida MJCh uchun kerakli bo‘lgan kadrlarni tayyorlash bo‘yicha aniq choralar belgilab olindi.