Bepul dori bilan…

Yurtimizda ijtimoiy himoya masalasiga alohida e’tibor qaratilgan. Ayniqsa, yolg‘iz, yakka keksalar qonunchilikka ko‘ra har yili bir marotaba sanatoriylarda bepul sog‘lomlashtiriladi. Qolaversa, sharoiti og‘ir va kam ta’minlangan keksalarga retseptga asosan 3 oylik ehtiyoj asosida dorilar, tibbiy va maxsus protez-ortopediya moslamalari olib beriladi hamda jarrohlik amaliyotlarining xarajatlari qoplanadi.
Og‘ir tashxisli kasal hamda nogiron keksalarga esa shifokorlar retseptlariga muvofiq, 3 oylik ehtiyojdan kelib chiqib, dori vositalarining 50 foizigacha summasi kompensatsiya qilinadi. Hali bu hamasi emas, keksalarning jismoniy tarbiya va sport bilan shug‘ullanishlari uchun abonement xarajatlari hamda davlat teatrlari va muzeylariga ular uchun chipta narxlari to‘liq qoplab berilishi ham yoshi ulug‘larga g‘amxo‘rlikning bir ko‘rinishidir.