Surxondaryo viloyati hokimi Ulug‘bek Qosimov Muzrabot tumani paxtakorlari bilan uchrashib, ularni shartnomaviy rejani bajarganliklari bilan muborakbod etdi. Tumandagi 2 ta klaster va 210 ta fermer xo‘jaligi tomonidan 9 200 gektar maydonda mo‘l hosil yetishtirilib, 32 338 tonnadan ortiq paxta xirmoni bunyod etildi va belgilangan reja 101 foizga bajarildi.
Hozirga qadar terib olingan g‘o‘za maydonlarida o‘rtacha hosildorlik 36-40 sentnerni tashkil etmoqda. Tumandagi “Amirqul bobo”, “Mamedov Ibodulla”, “Salim” va “O‘ngboev Asadbek” fermer xo‘jaliklari tomonidan o‘rtacha 45-50 sentner hosildorlikka erishildi.
Viloyat rahbari shartnomaviy rejani bajarishga o‘z hissasini qo‘shgan klasterlar, fermer xo‘jaliklari, ularga yordam bergan korxona va tashkilotlar hamda tumanning barcha mehnatkashlariga o‘z minnatdorchiligini bildirdi. Mavsumda faollik ko‘rsatgan fermer xo‘jaliklari rahbarlari, ilg‘or terimchilar, mexanizatorlar va mehnat faxriylari hamda tuman sektor rahbarlari qimmatbaho sovg‘alar bilan taqdirlandi.
Islom Mengliyev
