Ziqnalar

Darvozaning qattiq chertilishi xonadon a’zolarini xavotirga soldi.
— Svetdandir…
— Gazdandir…
— Ishqilib gadoy ham bo‘lmasin, pul bergim yo‘q…
— Vahima qilmasdan borib ochsalaring, bilamiz, — dedi uyning kattasi o‘dag‘aylab.
— Bobo, qo‘rqmanglar, qo‘shni mahalladagi Orif aka vafot etibdi, janozaga aytgani kelishibdi, — dedi eshikka qaragan bolakay.
Hamma baravar chuqur nafas olib bir ovozda jo‘r bo‘ldi:
— Xudoga shukr…