“Yuksalish” umummilliy harakati va O‘zbekiston notarial palatasi hamkorligida Termiz shahridagi “Yoshlar markazi”da “Mening oilam – mening huquqim” shiori ostida ijtimoiy aksiya tashkil etildi. Mazkur aksiya “Notarius maslahati” gazetasining Oliy Majlis huzuridagi NNT va fuqarolik jamiyatining boshqa institutlarini qo‘llab-quvvatlash Jamoat fondi tomonidan moliyalashtirilgan grant loyihasi doirasida, shuningdek fuqarolarning huquqiy ongi va madaniyatini oshirish, xalq bilan o‘zaro aloqalar mexanizmini yaratish, huquqni qo‘llash sohasida mavjud muammo va kamchiliklarni aniqlash hamda ularni bartaraf etishga qaratilgan taklif hamda tavsiyalar ishlab chiqish maqsadida tashkil etildi.
Aksiyada 10 nafar xususiy amaliyot bilan shug‘ullanuvchi malakali notarius yoshlar va mahalla fuqarolariga huquqiy maslahat berish jarayonida ishtirok etdi. Mutaxassislar tomonidan fuqarolarga turli huquqiy muammoli masalalarda, shu jumladan nikoh, ko‘chmas mulk (hadya, oldi-sotdi shartnomalari, ayriboshlash shartnomalari), hujjatlar tarjimasini bir tildan boshqa tilga o‘girish, uy-joy bo‘yicha ishonchnoma maslahati, er-xotinning umumiy mulkdagi shartnomasi, nizolarni sudgacha hal qilish va meros masalalari yuzasidan bepul huquqiy maslahatlar va amaliy yordam ko‘rsatildi.
Aksiyada ishtirok eta olmagan fuqarolar uchun “Yuksalish” UMH Surxondaryo viloyati hududiy bo‘linmasi va O‘zbekiston Notarial palatasi Surxondaryo viloyati bo‘linmasi elektron manzillari berildi.
Islom Mengliyev
