Hech bir harakat e’tiborsiz va e’tirofsiz qolmaydi. Ayniqsa, kelajak avlod taqdirini o‘zgartirish, yaxshilash uchun qilingan har qanday ish mukofotga arziydi. Bog‘chalarda tarbiyalanuvchilarning ilm-fanga qiziqishini oshirishga qo‘shilgan hissa ham rag‘batlantirishga munosib, albatta. Maktabgacha ta’lim tashkilotlarida xodimlar erishgan natijalardan kelib chiqib, zarur shartlar bajarilganda maoshiga bir martalik qo‘shimcha haq beriladi.
Bordi-yu, tarbiyachi-pedagog tuman va viloyat miqyosdagi ko‘rik-tanlovlarda ishtirok etgan bo‘lsa, lavozim maoshiga nisbatan 15 foizgacha, respublika miqyosidagi natijalar uchun 20 foizgacha rag‘batlantiriladi. O‘yin tamoyiliga asoslangan zamonaviy mashg‘ulotlarni tashkil qilganligi uchun esa 15 foizgacha, tarbiyalanuvchilarni ilm-fanga qiziqishini oshirishga qo‘shgan hissasi uchun 20 foizgacha ustama beriladi.
Bu kabi rag‘batlar mutaxassislarning o‘z kasbiga mas’uliyatini oshiradi. Faollikka chorlab, o‘z ustida ishlashga, muvaffaqiyatga erishishga xizmat qiladi.
S.Murodova
