Filmda eng asosiysi g‘oya. Aytilayotgan fikr original va tomoshabinning e’tiborini torta olishi kerak. Qolaversa, nihoyaga qiziqtira olishi, oxiri nima bo‘lishi esa kutilmagan burilishga boy bo‘lishi lozim. Qahramonlar aytayotgan har bir so‘z, fikr ham kundalik suhbatlardan iborat bo‘lmasin, e’tiborni tortib, yodda qoladigan bo‘lsin. Bugungi kinolarimizda ayni jihatlarning e’tiborga olinmasligidanmi, ssenariyning sayozligidanmi, xullas ko‘rganda ensa qotib, boshqa kanalga o‘tib qo‘ya qoladigan holatga kelib qolganmiz.
Ana shunday bir paytda o‘zgarishlar qilishni ko‘ngliga tugib bir guruh surxondaryolik kino ijodkorlar dramaturg Salim Qodirov qalamiga mansub “Bezori bola deb” nomlangan asar asosida to‘liq metrajli badiiy kinofilmni suratga oldilar. Bu esa rejalashtirilayotgan keyingi kinofilmlarning de’bochasi bo‘lib xizmat qilsa, ajab emas.
Filmning taqdimoti esa Jarqo‘rg‘on tumanidagi 20-sonli Madaniyat markazi tomosha zalida bo‘lib o‘tdi. Aytish joizki, “Bezori bola” kinofilmdan ko‘zlangan asosiy maqsad, hozirgi kunda jamiyatimizda uchrab turgan ba’zi muammolar, o‘qituvchilarni o‘quvchi hamda ota-onalar tomonidan kamsitilishi, yoshlarning kattalarga nisbatan hurmatini yo‘qolishi va shunga o‘xshash illatlarni bartaraf etishga qaratilgan. Kinofilmni tomosha qilish davomida esa tomoshabinlar, ayniqsa, yoshlar o‘zlariga tegishli xulosani chiqarishadi deb umid qilamiz.
Sohibjamol
