Har qanday kuy va qo‘shiq, unga hamohang tarza ijro etiladigan raqs bilan bir butunlik kasb etadi. Hamma ijrolar ham ko‘ngilga manzur bo‘lavermaydi. O‘ziniki qilinmagan raqs beo‘xshov chiqadi. Shu sababdan ham ayni musiqani, qo‘shiqni his etib, dardini tushunib ijro etilsagina, tomoshabinga manzur bo‘ladi. Termiz shahridagi Yoshlar markazida “Besh tashabbus” olimpiadasi doirasida bo‘lib o‘tgan raqs tanlovining viloyat bosqichida ishtirok etgan yosh raqqosalarning ijrosi ham ana shunday o‘ziga xos bo‘ldi.
Tanlovning milliy raqs yo‘nalishi bo‘yicha 10-15 yosh toifasida jarqo‘rg‘onlik ishtirokchi Gulshan Boltayeva o‘zining ajoyib va betakror raqsi bilan barchaning e’tiborini, mehrini qozondi. Bu esa besamar ketmadi, Gulshanning nafis harakatlari eng yuqori natija qayd etishiga, tanlovda 1-o‘rinni olib, respublika bosqichiga yo‘llanmani qo‘lga kiritishiga sabab bo‘ldi.
S.Murodova
