Vohada yetishtirilgan qishloq xo‘jaligi mahsulotlari ichki bozor rastalarini egallaydi. Ortgani esa eksportga yo‘naltiriladi. Shu jihatdan ham viloyatimizda eksportyor korxonalarning o‘rni va ahamiyati muhim. Birgina Angor tumanida 21 ta eksportyor korxona faoliyat yuritib kelmoqda. Hududda yetishtirilgan mahsulotlarni har yili xorijiy davlatlarga erta bahordan eksport qilish ishlari qizg‘in tus oladi va jarayon butun mavsum davom etadi. Bu esa eksportyorlar uchun sharoitlar yaratish zaruriyatini yuzaga keltiradi.
Ushbu korxonalarga yetarli shart-sharoitlarni yaratish maqsadida Surxondaryo viloyati hokimi Ulug‘bek Qosimov Angor tumani “Bahor” mahallasida viloyatda faoliyat yurituvchi eksportyor korxonalar rahbarlari bilan uchrashuv o‘tkazdi. Uchrashuv davomida eksportyorlarning faoliyatida duch kelayotgan muammolar, ularning faoliyatlarini qo‘llab-quvvatlash masalalari muhokama qilindi.
Uchrashuv davomida soha masʼullari va tuman mutasaddilariga bir oy muddatda “Bahor” mahallasi hududida zarur sharoitlarga ega “Eksportyorlarni qo‘llab-quvvatlash markazi” tashkil etish topshirig‘i berildi. Markazda eksportyorlar uchun ovqatlanish, yuvinish, dam olish joylari tashkil etiladi va hujjatlar rasmiylashtiruvi bilan bog‘liq mutasaddi tashkilotlar vakillarining markazda faoliyat yuritishini taʼminlash orqali vaqt sarfi kamaytiriladi.
H.Kamolova
