Viloyatimizdagi kasb-hunar maktablarida “oshpaz-qandolatchi” kasbi bo’yicha tahsil olayotgan bo’lajak oshpaz va qandolatchilarga oshpazlikning bor sir-asrorlari o’rgatib kelinayotir. Buni o’quvchilarning mahoratidan, tayyorlagan taomlari-yu, dasturxonga tortishlaridan bilish, ko’rish mumkin.
Termiz shahar kasb-hunar maktabida bo’lib o’tgan “WorldSkills Uzbekistan” tanlovining viloyat bosqichida kasb-hunar maktablarining o’quvchilari o’z iste’dod va mahoratlarini namoyish etdilar.
Ular 3 ta shart bo’yicha mavsumiy mahsulotlardan salat va desertlar tayyorlashdi. Hakamlar hay’ati eng avvalo, oshpazlarning taom tayyorlashdagi sanitar-gigiyenik holatlariga e’tibor qaratishdi. Taom tayyorlash texnologiyasi, ko’rinishi va mazasiga, qolaversa, vaqtni ham inobatga olishdi.
Tanlov so’nggida Termiz shahar kasb-hunar maktabining yosh oshpazlari birinchi o’ringa loyiq topildi va tanlovning respublika bosqichiga yo’llanmani qo’lga kiritdi.
✒️ S.Normurodova
