Surxondaryo viloyati hkimi Ulug‘bek Qosimov Muzrabot tumanida bo‘lib, hududlarning ijtimoiy-iqtisodiy rivojlanishi hamda amalga oshirilayotgan bunyodkorlik ishlari bilan tanishdi.
Tashrif davomida D-165 avtomobil yo‘lining “Fidokor” va “Buyuk ipak yo‘li” mahallalari hududidan o‘tgan qismida olib borilgan obodonlashtirish va ko‘kalamzorlashtirish ishlari ko‘zdan kechirildi. Mazkur yo‘lning 300 metr qismida yo‘l chetlari namunali tarzda tuproq bilan to‘ldirilib, Yashil makon umummilliy loyihasi doirasida manzarali daraxt ko‘chatlari ekilgan hamda ularni parvarishlash uchun zamonaviy yomg‘irlatib sug‘orish tizimi joriy etilgan.
Viloyat hokimi ushbu tajribani kengaytirish, avtomobil yo‘llari bo‘ylab yashil hududlar va yashil belbog‘lar tashkil etish bo‘yicha mas’ullarga tegishli topshiriqlar berdi.
Ma’lumot uchun, ayni paytda D-165 avtomobil yo‘lining Muzrabot tumanidagi 39–50-kilometrlari hamda Angor tumani hududidan o‘tuvchi 26–39-kilometrlari oralig‘ida keng ko‘lamli ta’mirlash ishlari olib borilmoqda. Loyiha yakunida yo‘l qoplamasi yangilanib, yo‘l bo‘ylari ko‘kalamzorlashtirilishi natijasida haydovchilar va yo‘lovchilar uchun yanada qulay hamda xavfsiz sharoit yaratiladi.
