Britaniya va AQSH olimlari o‘tkazgan tadqiqotga ko‘ra, so‘nggi 20 yil davomida Yer yuzidagi okean suvining katta qismi — taxminan 56 foizi o‘z rangini o‘zgartirgan. Yaqin vaqtgacha ko‘zga tashlanmagan bu o‘zgarishlar endi sun’iy yo‘ldoshlar yordamida aniq qayd etilmoqda. Asosiy o‘zgarish esa ko‘k rangdan yashil va hatto qorong‘u tuslarga o‘tishda kuzatilmoqda.
Tadqiqotchilarning fikricha, bunday o‘zgarishlar suvdagi fitoplankton, ya’ni mikroorganizmlar miqdoridagi o‘zgarishlar bilan bog‘liq. Ushbu o‘zgarishlar esa global iqlim o‘zgarishi, suv harorati oshishi va ekotizimdagi muvozanat buzilishi natijasida yuzaga kelgan bo‘lishi mumkin.
Yashil rangning kuchayishi suvdagi biologik faollikning oshganini anglatishi mumkin, ammo bu faqatgina ijobiy belgi emas. Aslida bu noto‘g‘ri rivojlanayotgan ekotizim yoki zararli mikroorganizmlar ko‘payishiga ishora bo‘lishi ham ehtimoldan xoli emas. Ushbu o‘zgarishlar dengiz hayvonlari, baliqlar hamda butun okean zanjiridagi ovqatlanish muvozanatiga ta’sir ko‘rsatishi mumkin. Shu sababli olimlar bu jarayonni jiddiy nazorat qilish va yaxlit tadqiqotlar olib borish zarurligini uqtirmoqda.
Xalqaro ekologik tashkilotlar bu ma’lumotlarni global ekologik xavfning jiddiy signali sifatida baholamoqda. Okean ekotizimlaridagi o‘zgarishlar butun insoniyat uchun turmush tarzi va xavfsizlikka ta’sir qiluvchi omil hisoblanadi.
