Yangi O‘zbekiston bog‘i qurilishiga start berildi

Allaqachon qish fasli boshlanib, ob-havo anchayin sovuganiga qaramay, yerga nihol qadab, bog‘ barpo etishdek ezgu ishlar hali to‘xtagani yo‘q. ana shunday ishlarning davomi sifatida Termiz tumani “Yangiobod” mahallasida ikki yirik loyiha — “Yangi O‘zbekiston” massivi va “Yangi O‘zbekiston” bog‘i barpo etilishi rejalashtirilgan bo‘lib, bir muddat oldin “Yangi O‘zbekiston” massivi qurilishiga start berilgan edi va hozirda turar joylar qurilishi olib borilmoqda.
Hududdagi ikkinchi yirik loyiha — “Yangi O‘zbekiston” bog‘i qurilishiga start berildi. Umumiy maydoni 27 gektar bo‘lgan bog‘ning tamal toshini Surxondaryo viloyati hokimi Ulug‘bek Qosimov qo‘yib berdi. Shuningdek, viloyat rahbari hududda amalga oshirilayotgan ishlar taqdimoti bilan tanishib, mas’ullarning axborotini tingladi hamda har ikkala loyihani belgilangan muddatlarda, sifatli amalga oshirish yuzasidan vazifalarni belgilab berdi.
Xayrli ish oldidan jonliq so‘yilib, Qur’on tilovat qilindi va boshlangan loyihalar rivojini so‘rab duoga qo‘l ochildi.